Satua Bali Ni Timun Mas

 

Lomba Mesatua Bali

Judul: NI TIMUN MAS

                                           Oleh

Ni Nyoman Seriati,S.Pd.AUD

Br.Pemijian

Desa Adat Sangeh

Wantilan Desa Adat Sangeh

21 Pebruari 2021

"Om Swastiastu"

“Rahajeng Semeng Semeton Titiang sareng sami,punapi gatrane!”....nggih......

Sawireh mangkin galah katiba ring titiang,titiang jagi ngajak semeton sareng sami mesatua bali

Semeton seneng mireng satua bali?....inggih.....

Satua bali wantah tetamian leluhur sane sandang patut kalestariang.

Sane mangkin titiang jagi menyatuayang indik

                                        Ni Timun Mas

 

Ada Katuturan Satua, ditu... disisin alase ,ade pondok reot mejujuk abesik, nongos ditu anak luh pedidi tusing ngelah nyen,kurenan sube mati,panak tusing ngelah,Nak luh totonan madan Men sari.

Geginan Men Sari sewai-wai tuah nuduk saang ke alase laut abane ke peken apang ade beliange baas tur daaran nasi.Risedek dina anu,bayun Men Sarie enduk care anak gelem,baasne telah,kenken jani baan medaya ,lemetang sube Men Sari ke alase nuduk saang pang nyidang meli baas.

Di subaane maan saang apesel lakar onjote abane mulih,risedek onjote saget meklecet bangkiang Men Sarine jangkeh,ditu ye ketulung-tulung sing ade nak nulungin.

“Aduuuh...aduuh......tulung...tulung.... dadi kene nasib tiange.....sing ade nak nulungin....,yen tiang ngelah pianak sinah ade ajak tiang mekaengan.”

Saget teka angin ngelinus mekuwus......

“Wakkkaaakkkk.....hhaaa.....”

(Makesiyap Men Sari)

“Yaih nyai manusa, ape alih nyai mai kealase, ke umah wakene ,dije panak nyaine ,kel amah wake”

(Ngejer men sari mesaut)

“Ampura raksasa tiang tuah nuduk saang,panak tiang tusing ngelah,amah sube tiang raksasa,idup tiang sube sing meaji”

(Mesaut raksasa)

“Nden malu yen wake ngamah nyai, bise telah pungak gigin wake ulian isin nyai kakkah Yen nyai dot ngelah pianak Ne ade batun ketimun pula, ade ditu ketimun mas mebuah besik mas tur gede ditu lakar nyai ngelah pianak,sakewale ingetang buin molas tiban wake lakar teka buin ngalih nyai ngalih panak totonan kel amah wake,kenken men sanggup nyai?’’

(Tusing mepineh malih Men Sari nyanggupin I Raksasa)

I Raksana ngemang Men Sari batun ketimun laut megedi pusss.....

Bes keliwat demen atin men sari ,sakit bangkiangne ilang,basang wareg tan peneda.Ngencolang Men Sari mejalan mulih lakar nanem batun ketimunne ento.

Gelis cerita semeton, ne jani saget sube gede batun ketimunne ento tur mebuah nged saje sube care munyin I Rakssa ade  buah ketimun abesik gede tur sube  tasak, ngencolang abanne  ke pondok teken Men Sari.neked di pondok tureke buah ketimun emas totonan (sreeettt .....daarrr....)

Saget rare cenik ngeling”....oee...oee.....”

Mih lega pesan kenehne Men Sari ngelah pianak, jemake anak cerike ento.”Cening-cening pianak meme,cening adanin meme Timun Mas”, ditu Men Sari ngelah pianak madan Ni Timun Mas.

Gelis cerita malih semeton, ne jani kacerita Timun Mas sube gede tur dadi anak ayu, jegeg, dueg, demen mapitulung, bakti teken  rerama.

Tusing kerasa sube molas tiban jani tuwuhne Timun Mas, mekesyap Men Sari inget teken janjine ngajak I Raksasa.

I Raksasa lakar teka ngalih Timun Mas lakar amahe, keto ningeh ortan memene, “jani cening sube kelih”(mesaut Timun Mas)”...meme takut tiang meme..”

Gelute panakne Men Sari “Nah ning de nyeh ning, ne jani mapan sube peteng jalan sirep malu de engsap nunas bakti ring Ida Sang Hyang Widhi Wasa nah ning dumadak i raga selamet rahayu”, sirep lantas ye ditu.

Kacerita disirepe Men Sari mengipi I Timun Mas orine ke gunung ngalih bagawan sakti ane lakar side nulungin I Timun Mas

Buin jani ngorte men sari unduk ipianne totonan ngajak  Timun Mas

Gelisen cerita ne jani sube neked I Timun Mas di gunung... mekunyit dialas..(napi semeton..)matemu sareng bagawan sakti.

Bagawan sakti ngicen petang  ungkus bekel ane lakar side maguna rikala ketiben baya.

Disubanne Timun Mas nerima 4 ungkus bekel ento ditu laut ia mejalan mulih. lega pesan keneh Men Sari nepukin panakne mulih slamet rahayu.

Nah semeton gelisin cerita, ne jani Men Sari lakar luas ke peken mebesen Men Sari teken pianakne Timun Mas, “ning meme jani lakar ke peken melahang ngancing jelanane de pe”san ngawag – ngawag mesaut yen ade nak mekaukan nah ning, ingetang pesen meme nah ning”...nah me... “(Keto sautne Timun Mas)

Mejalan Men Sari ke peken, disubane Men Sari kepeken teka jani I Raksasa ngalih Timun Mas kauk - kauk...

“Timun mas...timun mas...ampakang jelanan timun mass....”

“Aduhh tusing meme to ane teka to pasti i raksasa ane teka”

Mekelo sing ampakine jelanan, mekalah I Raksasa sakewala mengkeb  ngintip sapetekan men sarine. Ne jani kacerita Men Sari teka uli peken megending......

“Putri Cening ayu.... ampakang meme jelanan ning ...”(Ngencolang Timun Mas ngampakan jelanan.)

“Ning mai je malu   ning meme ngabe gapgapan  jaje bali, ade laklak,(...napi malih semeton...) ongol - ongol, sumping,,ajeng ning”(......sambil ngajeng ngorte I Timun Mas)

I tunian ade nak  teka munyine gede  serem tusing ampakine jelanan.demen memene ningehang ortan panakne Timun Mas.

Kacerita jani I Raksasa sube nawang kenken carane mekaukan apang nyak ampakaine jelanan ken Timun Mas, buin manine kacerita malih Men Sari ke peken di subane Men Sari kepeken teka I Raksasa.

Jani I Raksasa mekaukan nuwutin munyinne Men Sari.

“Putri cening ayu ....ampakan meme jelanan ning....”(mesaut I Timun Mas)

“Meme adi keto munyin memene”, (Ken ken sautne semeton), “Meme gelem ning liyu naar es  dipeken,enggalang ning....”( mepineh I Timun Mas),” aduh kudiang jani sing ngidang medaya, jani kene sube baan bekele ane baange teken I Bagawan sakti lakar abe yen saget I Raksasa totonan ane teka yen sing jani ampakan jelanan i meme gelem”. Ampakange jelanan teken Timun Mas,kriuutttt.....

Becat I Raksasa nyaup Timun Mas plaibange ke alase.Teka mangkin Men Sari uling peken bengong melengok Men Sari, pondokne suwung, Timun Mas sube ilang ngeling mepangenan Men Sari.

Di tengah alase Timun Mas ketulung - tulung sing ade nak nulungin.  Blekuke ajak I Raksasa Kudiang jani sing ade nak nulungin jani kel pesuang sube bekel e ane paling malunan.Pesuange bekelne ane paling malunan semeton ,isinne batun timun, sria.....kkk..sambehinne batun ketimunne. Saget ade abian ketimun mebuah nged ,ditu  kelangen I Rakasa nepukin buah ketimun ane liyu,lebange Timun Mas maan ye ngeleb I Raksasa ngamah ketimunne kanti betek basangne, Timune telah, basangne betek  buin I Raksasa inget teken timun mas buin kepunge I Timun Mas, Timun Mas melaib...”Aduh kudiang jani I Raksasa ngancan paek ,buin kel pesuang bekel ane no 2”,(Napi bekelne ane no 2 semeton) isinne jaum. sriookkk.... sambehange jaume ajak Timun Mas dadi abian tiing lanying - lanying pesu, ditu ngensut  I Raksasa mekekeh nagih pesu uling abian tiinge totonan, tusing mekelo nyidang I Raksasa pesu, nyidang buin ngepung Timun Mas...”aduh bekel ane no 3 jani kel pesuang”Mare sambehangen bekel ane no 3, jeg bise nyedot tanahne, I Raksasa sedote ken tanahe ento, mekehkeh mase ia pesu tetep mase sing nyidang terus I Raksasa sedote ken tanahe ento ,mati ditu ye I Raksasa,Selamet ye I Timun Mas.Mangkin gelis Timun Mas mulih ngalih memene .Ne Jani mekunyit di alas metemu malih Ni Timun Mas ngajak memene Men Sari ,hidup bagia bareng-bareng.

Semeton Kadi Asapunika sane presida satuayang titiang ngeningin indikne Ni Timun Mas Dumogi wenten pikenuhnyane,Cutetnyane Pisan sampunang lali ngerastiti bhakti ring Ida Sang Hyang Widhi Wasa duaning wantah Ida Sane presida ngardi kerahayuan ring jagate,kirang langkung antuk titiang ,titiangnunas Sinampura.

Om Santhi,Santhi,Santhi,Om.....

 seriati14blogspot.com